اسلام آباد ۔ 9 فروری (اے پی پی) وزیراعظم شاہد خاقان عباسی سرسبز پاکستان دے عزم دا اظہار کریندے ہوئیں جمعے کوں وزیراعظم آفس اچ بوٹا لاتے موسم بہار شجرکاری مہم دا آغاز کر ڈتا۔ مہم دے دوران سرسبز پاکستان اتے صحت مند ماحول دے ودھارے سانگے ملک بھر اچ بوٹے لاتے ویسن۔ ایں موقع تے وزیر موسمیاتی تبدیلی مشاہد اللہ خان اتے رکن قومی اسمبلی رومینہ خورشید عالم وی وزیراعظم دے نال ہن۔ ایں موقع تے مہم دی کامیابی سانگے دعا وی منگی گی ۔ گرین پاکستان پروگرام دے تحت 10کروڑ اضافی بوٹے لاتے ویسن ۔ سال 2016-21دے عرصے سانگے ایں پروگرام دی مجموعی لاگت 3.652 ارب روپے ہے۔ وزیراعظم شاہد خاقان عباسی سرسبز پاکستان دے عزم دا اظہار کریندے ہوئیں سارے پاکستانیاں بالخصوص کاشتکار برادری، طالب علماں، ارکان پارلیمان، مختلف شعبیں نال تعلق رکھنڑ آلے لوکاں تے تریمتاں تے زور ڈتا جو ودھ توں ودھ بوٹے لاتے موسم بہار شجر کاری مہم 2018اچ سرگرمی نال شرکت کرن ۔
