اسلام آباد۔ یکم اکتوبر (اے پی پی) قائم مقام صدر سید یوسف رضا گیلانی نال ایتھوپیا دے سفیر ڈاکٹر جمال بکر عبد اللہ ایوان صدر وچ الوداعی ملاقات کیتی۔ ایوان صدر دے پریس ونگ توں جاری بیان موجب قائم مقام صدر پاکستان تے ایتھوپیا تعلقات کوں ودھاوݨ تے مضبوط بݨاوݨ وچ سفیر دی کوششاں دی تعریف کریندے آکھیے جو ایتھوپیا دے سفیر ݙوہیں بھرا ملکاں وچال سیاسی، معاشی تے عوام وچال رابطے کوں اڳوں تے ودھاوݨ وچ کلیدی کردار ادا کیتے۔ انہاں گرین پاکستان انیشیٹو وچ ڈاکٹر جمال بکر عبد اللہ دے تعاون تے موسمیاتی تبدیلی نال نبݨݨ وچ انہاں دے فعال کردار دی وی تعریف کیتی۔ قائم مقام صدر سفیر کیتے نیک خواہشات دا اظہار کریندے ایں یقین دا اظہار کیتا جو پاکستان تے ایتھوپیا دے تعلقات اڳوں آوݨ آلے سالاں وچ مزید تکڑے تھیسِن۔ انہاں ایتھوپیا دی پارلیمنٹ دے ݙوہیں ایواناں دے سپیکرز کوں اڳلے مہینے اسلام آباد وچ تھیوݨ آلی بین الپارلیمانی سپیکرز کانفرنس وچ شرکت کیتے دعوت نامے وی سفیر دے حوالے کیتے۔ سفیر ڈاکٹر جمال بکر عبد اللہ قائم مقام صدر سید یوسف رضا گیلانی دے قائدانہ کردار دی تعریف کریندے آکھیے جو ایتھوپیا سودھے پورا افریقی خطہ پاکستان دے افریقی ملکاں نال تعلقات دے ودھارے وچ انہاں دیاں خدمات دا اعتراف کریندے۔ انہاں آکھیے جو پاکستان براعظم افریقہ کیتے ہک اہم ملک اے تے ایتھوپیا پاکستان نال آپݨے تعلقات کوں انتہائی قدر دی نگاہ نال ݙیکھدے۔ سفیر آکھیے افریقی خطہ پاکستان کوں ہک مخلص تے بھرا ملک سمجھدے، پاکستان نال تعلقات کوں ترجیح ݙیوݨ وچ سید یوسف رضا گیلانی دی کوششاں کوں ایتھوپیا ہمیشہ یاد رکھیسی۔ انہاں پارلیمانی سفارت کاری دے ذریعے عوام نال عوام دے رابطے ودھاوݨ وچ قائم مقام صدر دے فعال کردار دی وی تعریف کیتی۔ ڈاکٹر جمال بکر عبد اللہ سینیٹ آف پاکستان وچ افریقہ ݙینھ دی تقریب تے ایں موقع تے منظور تھیوݨ آلی قرارداد کوں یاد کریندے اینکوں ہک سنگ میل قرار ݙتا جیڑھا سارے افریقی ملک ہمیشہ یاد رکھیسن۔ انہاں آکھیا جو پاکستان عالمی سطح تے ودھدا ہویا اہم کردار ادا کریسی۔ انہاں یقین ݙٰیوائے جو ایتھوپیا ایں سفر وچ پاکستان دا ساتھی رہسی۔ سفیر آکھیے پاکستان ہمیشہ انہاں دے دل دے نیڑے رہسی تے او اسلام آباد وچ قیام دے دوران دوستی تے مہمان نوازی کوں یاد رکھیسن۔ انہاں آکھیا او ذاتی طور تے ایتھوپیا دی پارلیمانی قیادت کوں کانفرنس دے دعوت نامے پُڄیسِن
